Mahalga’ Suhba kan Habib Ali Al-Jufri

Kanyuknyukan himumungan hi Maulana Shaykh Nazim

Mahalga’ Suhba kan Habib Ali Al-Jufri

23rd November 2010

A’uzubillah himinash shaitan nirrajeem

Bismillah-hir Rahman-nir Raheem

Assalamu’alaikum wrh wbkt

(In Suhba ini dihil ha kanungnungan Habib Ali Al-Jufri, ha waktu siya miyadtu timibaw ha Maulana ha hula’ Lefke. Dihilan siya Suhba sin Maulana palihalan ha Sultanul Ariffin Sayyidina Abu Yazid Al-Bistami, hikaunum Shaykh Mahabassal sin Tarika Naqshabandi, in tampat niya ha Damascus, in agi sin kaibanan ha Iran).

Maulana: In tiyap-tiyap Manusiya’ ha laum sin buga’ amad ha adlaw paghukum. Hisiyu in di’ muga’ hukumun ha unahan sin Tuhan ha adlaw yadtu. In atay hi Sayyidina Abu Yazid al-Bistami [bangman daran angkatun sin Allah SWT in tiyampatan niya iban sussihun in rahasiya’ niya] daran nangayu’ sin adlaw yadtu. In pamung niya: “Mabaya’ ku kadungugan in Tuhan ku magtawag kaku’ ha adlaw yadtu! “O Aba Yazid!” In Tuhan ku magtag sin ngan ku ha adlaw yadtu – Unu pa baha’ in napsuhun ku? Paghuwas ku kadungugan nagtag Siya sin ngan ku, misan pa in kaawnan hi tilu’ Niya Aku pa api narka’, di’ da makaunu, di’ na aku muga’ sin baga’ kayu ha laum api narka’, biya’ da sin kahantang di’ na aku makabaak kakuyagan misan pa hidihil Niya kaku’ in katan sulga’ [bilang ganti’ pa lanab kiyananaman ku paghuwas Niya aku tiyawag].

“Hambuuk nadtu kalagguan, hambuuk na kalimu’, para kaku’ kadungugan ku Siya magtag sin ngan ku! Iban bang aku hukumun Niya, iban asubuhun Niya, unu pa in kalagihan ku paghuwas yadtu, sambungan ku Siya, ‘di’ na aku maglagi unu-unu, jukup na ini kaku’ daing ha waypa-limaya sambil limaya, dumungug ha Tuhan magtag sin ngan ku.’ In Tuhan, in Sipat niya, In kallam Niya, limaya, salama-lama ha taynga ku bang ku kadungugan in suwara Niya magtag sin ngan ku, “O iypun ku, O iypun ku, O iypun ku, O Aba Yazid.” Amuna ini in katan kalagihan ku, di’ na aku magnapsu sin sulga, iban di’ na aku muga’ ha narka’, dumungug ha Tuhan ku Salaggu-laggu’ magtag sin ngan ku, misan in kaawnan ku wayruun….” Unu kahalan in bihaini, amun Makam wayruun na kanapsuhan dugaing malaingkan Allah? O iypun sin Allah, daran kaw iban Tuhan, bat kaw tabangun Niya.

Habib: Mangayu’ kami kaampunan iban kaihlas.

Maulana: Hisiyu aku [magdihil sin unu –unu]? Mayta’ way nabi ta [saw] [mangayu’ kaw kaku’ ha ini]? Di’ baha’ pakuyagun sin Allah swt in Rasulullah [labay hapagdihil kaampunan iban kasalamatan pa ummat niya]? Bunnal tuud, in Rasulullah [saw] masusa bang siya kalawaan misan dakuman hambuuk bangsa hitilakbu’ pa api narka’, unu hitilakbu’ niya baha’ misan hat hambuuk iypun niya pa laum api narka’?

Habib: Bunnal, in Allah nakajanji ha Rasulullah [saw] di’ niya hinaun. Mangayu’ aku kaihlas iban kaampunan sabab maluman aku pa Allah.

Maulana: [siyambag hanunut] Bunnal baha’ tuud maluman kita [ha katan kasabunnalan]? In pagpatibaba’ malugay na daing ha kaig di ha dunya [ha masa in Jibril [as] dimatung nagig sin Haya daing ha dunya], in tau nakauna maluman himinang dusa pa Allah, sagawa’ in manga tau bihaun di’ na.

Habib: Mangayu’ kami [ilmu’ iban pamandu’] daing ha patti, Oh Shaykh.

Maulana: In Rasulullah [saw] bakas nangayu’ pa Allah, “Dihilan kaku’ in Bangsa ini,” iban in Allah simambung, “Amunayan in bangsa iyampun, naputus sin rahmat. Dihilan tanakaw bangsa, bangsa Mu, O Nabi ku kalasahan [saw].” In kitaniyu ini Ummatun Marhumah, Ummatun Maghfura. Bang awn ka’patan anak mu, matayma mu bang in hambuuk daing kanila kawaun sin Sultan? Makasanyang baha’ yadtu sin pangatayan mu?

Habib: Di’.

Maulana: In Rasulullah [saw] rahmat pa katilingkal alam, In Allah dimihil kaniya, sahingga in atay niya kadulan! In Allah namung pa Rasulullah [saw], “Sahingga in atay mu kadulan, sahingga in atay mu wayna bimbang, pamungan unu in kabayaan mu, oh kakasi ku!” [Iban in Rasulullah [saw] di’ kadulan, sahingga in katan namamaratsaya, masalamat sin Allah]

Habib: Laung sin Allah ha laum Qur’an:

وَلَسَوۡفَ يُعۡطِيكَ رَبُّكَ فَتَرۡضَىٰٓ

Iban sabunnal tuud in Tuhan mu magdihil kaymu [O Muhammad] ha supaya kaw wayna bimbang. (Quran 93:5)

Maulana: Unu kita? In kita ini sapantun sanam ha mata sin Allah. Bang in sanam makahinang kasaan, dugalan ka kita iban mahiluka kita hadtu? Makasusa baha’ yadtu katu’?

Habib: Di’.

Maulana: Pahama ini, sabab amunadtu in lawang sin kakuyagan. [Amunadtu, subay kita makuyag awn Tuhan bayng ampunun, subay di’ malawa’ in paghuwat ta ha rahmat iban kaampunan sin Allah, in Siya daran nangampun ha manga tau bariman magtatawbat, daing ha sabab yadtu subay kita makuyag].

Habib: In Shaykh [Maulana] amuna in lawang ta pa kakuyagan. Ha laum hadis, in Rasul [saw] nagsabda, “Bissarahan in kakuyagan iban rahmat, ha supaya kumuyag in atay sin manusiya’”[In Maulana daran nagpakuyag ha manusiya, laung niya, mataud na tuud kasusahan ha dunya, butangi kakuyagan in pangatayan nila sambil maig in sakit]

Habib: Bukun ka in Allah bayng ampunun? Hisiyu in ampunun Niya? Unu in kaampunan para baha’ ha Rasul [saw]? Hasha, bukun. In kaampunan Niya para ha manga tau bardusa! [daing ha sabab yadtu in bardusa subay di’ malawa’ in paghuwat ha rahmat iban kaampunan Niya, sabab laung sin Allah, “In rahmat ku maluag daing sin mulka’ ku”].

إِنَّا فَتَحۡنَا لَكَ فَتۡحً۬ا مُّبِينً۬ا. لِّيَغۡفِرَ لَكَ ٱللَّهُ مَا تَقَدَّمَ مِن ذَنۢبِكَ وَمَا تَأَخَّرَ وَيُتِمَّ نِعۡمَتَهُ ۥ عَلَيۡكَ وَيَہۡدِيَكَ صِرَٲطً۬ا مُّسۡتَقِيمً۬

Sabunnal tuud, dihilan namu’ na kamu salaggu-laggu pangukab. (1) Hasupaya in Allah mangampun kaymu ha dusa mu nakalabay iban ha susungun, iban jukupun na sin Allah in rida’ kaymu, iban panduan Niya kaw ha dan mabuntul (2) (Quran 48:1-2)

Maulana: In dusa nakalabay iban susungun, iyampun na [hisiyu-siyu in tulus ihlas magtawbat]. Ha atud mu awn baha’ daing ha manusiya makalipuwas daing hapagtajakki iban paghukum sin Allah? Wayruun tupun tumindug ha unahan Niya sambil hukumun! [Daing ha sabab yadtu pangayu’ nakaw kaampunan ha di’ pakaw mamayhu’ Kaniya]

Habib: Makuyag kami sabab sin yari kami iban ikaw [Maulana] ha dunya iban ha adlaw ahirat. In manga ini kiyatakdil na daing pa ha adlaw sin Alastu birabbikum, Amun adlaw pagjanji’! [In satiyap Wali bakas na dihilan manga murid daing ha adlaw yadtu, iban sambil magiban [magpandu] ha manga murid niya sambil pa limaya, daing ha sabab yadtu in Habib matanam na di ha Maulana, sabab in tiyap-tiyap kambing subay didtu ha magiipat kaniya ha supaya siya masalamat daing ha mangutkut iru’.]

Maulana: Qalu bala! Alhamdulillah! In ini bakas na kiyatukbal daing ha adlaw pagjanji’. In kita ini iypun Niya Muslim, iypun Niya kita, di’ Niya kita hitilakbu’ pa laum Api Narka, magsukul Allah hadtu. Sagawa’ subay ta kaingatan in hambuuk parakala’. In Rasul [saw] nagsabda: “Hinduan aku sin Allah sin sarayaw-rayaw kaul piil.” Daing ha sabab yadtu hisiyu-siyu in labi marayaw kaul-piil, didtu siya ha panakup sin Tuhan, sagawa’ in taga kaul piil mangi’, biya’ sin sipat binatang, hibutang ha pagbubuhian binatang didtu na sila magpajatu sin hawa napsu nila, kumaun iban minum. [Misan in katan ummat sin Nabi Muhammad [saw] masalamat, mataud da isab jinisan sin sulga’ – in kaibanan masuuk pa Allah, in kaibanan isab kiyatatamingan. In rasul [saw] piyara papagtubusun sin kalakkuan manusiya’, subay kitaniyu di’ kadulan sin hat hadja himinang sin matampal sa tiyu-tiyu ka Islam, subay kitaniyu maglugtu’ sin sataas-taas pamaratsaya, umbul satu daing ha katan namamaratsaya! Sabab amuna manga namamaratsaya ini in labi masuuk pa Allah, salama-lama]

وَكُنتُمۡ أَزۡوَٲجً۬ا ثَلَـٰثَةً۬ (٧) فَأَصۡحَـٰبُ ٱلۡمَيۡمَنَةِ مَآ أَصۡحَـٰبُ ٱلۡمَيۡمَنَةِ (٨) وَأَصۡحَـٰبُ ٱلۡمَشۡـَٔمَةِ مَآ أَصۡحَـٰبُ ٱلۡمَشۡـَٔمَةِ (٩) وَٱلسَّـٰبِقُونَ ٱلسَّـٰبِقُونَ (١٠) أُوْلَـٰٓٮِٕكَ ٱلۡمُقَرَّبُونَ

Iban pinigun da kamu pa tungkajinis kabahagi. [7] Paghuwas [awn da isab] tumpukan sin Lima tuu – Unu baha’ in tumpukan sin Lima tuu? [8] iban tumpukan sin Lima lawa – Unu baha’ in tumpukan sin Lima lawa? [9] In manga sila sataas-taas [ha pamaratsaya] amuna in sataas-taas ha [ha adlaw mahuli] [10] Sila na ini in manga masuuk pa Allah: [11] (Quran 56:7-11)

Maulana: In ini nahinang na panghati sin kaluagan in binatang di’ hukumun. Tagainupa in ikaw hambuuk maguuma. Bang in binatang makakadtu pa uma mu, sambil kiyaawn niya in pananum, tantu tuud in ikaw mamaytai pa huwis sin jimatu, ha supaya mu mabawi’ in manga naluppas kaymu. Unu daakun baha’ kaw sin huwis hipara in binatang [biya’ na sin sapi’] pasaksiun iban magdihil hilalaungan ha paghuhukuman?

Habib: Di’.

Maulana: Bang bihadtu, hisiyu in dahun papaghukuman? Amun tagdapu sin binatang, magiipat! Daing ha sabab yadtu mataud manusiya biya’ binatang [sapi’] ha pangaddatan/kalakkuan/sipat. In sapi’ wayruun tuud kiyadihilan pagtanggujawab. In manusiya’ bihaun awn sipat nila biya’ binatang, ha bihaun, in katan nabubuhi bukun ha laum sayu, iban way pagtanggungjawab – biya’ da binatang! [Daing ha sabab yadtu subay awn ipatan ta, abugaw amun magpalindug katu’ ha paghuhukuman sin Tuhan, subay kita maglawag magtutunyuk! Hisiyu-siyu in wayruun shaykh sah nila kawaun in hawa napsu nila hinangun magtutunyuk.

أَرَءَيۡتَ مَنِ ٱتَّخَذَ إِلَـٰهَهُ ۥ هَوَٮٰهُ أَفَأَنتَ تَكُونُ عَلَيۡهِ وَڪِيلاً. أَمۡ تَحۡسَبُ أَنَّ أَڪۡثَرَهُمۡ يَسۡمَعُونَ أَوۡ يَعۡقِلُونَ‌ۚ إِنۡ هُمۡ إِلَّا كَٱلۡأَنۡعَـٰمِ‌ۖ بَلۡ هُمۡ أَضَلُّ سَبِيلاً

Kita’ mu kasiya [O Muhammad saw] in amun tau hinang niya Tuhan in hawa napsu niya? Mabaya’ kakaw hinangun paghuwas yadtu wakil [magjajaga sin kahalan niya] kaniya? [43] atawa unu hapikil mu in kamatauran nila nakadungug atawa nakahati? In sila biya’ da ha sapi; – in sila gamman na maglalayu daing ha dan. [labi pa in ngi’ daing ha sapi’] (Quran 25:43-44)

Habib: In kita ini sapi, O Shaykh!

Maulana: Bang kita magpinda, hi ig in sipat ta binatang, paghuwas yadtu bukun na kita sapi’, abutan tana in tampat ta ha sulga’, mahinang kita daing ha tau Malakut, Tau Sulga’. In sila amun way kaul piil marayaw, biya’ da sila binatang, di’ sila makabawgbug tanggungjawab. [in tau mangi’ in kaul-piil hibutang hapagiipatan binatang, malayu daing ha astana’. Sagawa’ in malanu’, amun maraw in kaul-piil, jarihun pa astana’, maglingkud iban sin Sultan].

Al-Fatiha

SAHAWI

Amuna ini in mahalga’ Suhba. In pagsambung laung hipu’ sin hikma matampal, hipu’ sin langan, iban mahunit natu’ tuud pahamun in kaluagan niya. Nasabbut sin Maulana awn manga Suhba ha sanam [Biya’ Katu] atawa pa gadja [Biya’ ha kanungnugan Habib Ali Al-Jufri]. In sanam di’ tuud makara ha darahan pagdahun sin gadja.

• Hisiyu hi Sayyidina Abu Yazid (qs) amun biyayta’ sin Maulana? Laung hi Sayyidina Junaid Al-Baghdadi hi Sayyidina Tayfur Abu Yazid al-Bistami (qs) amuna in mataas daing ha manga Sufi.” Mabassa mu di in nusulan kabuhi niya [Link]

• Hi Sayyidina Abu Yazid (qs) bakas naasubu, “Pakitaan kaku’ in hinang amun hikaalup ku ha Tuhan.” Simambung siya: “Lasaha in kakasi sin Allah ha supaya kaw kalasahan nila. Lasaha in Awliya niya sahingga kaw lasahun nila. Sabab in Allah umatud pa pangatayan sin manga Awliya’ Niya iban bang Niya kakitaan in ngan mu nakaukkil ha atay sin awliya’ Niya in ikaw ampunun Niya.” Daing ha sabab ini, in manga ahli sin Naqshabandi iyangkat sabab sin paglasa nila ha manga Shaykhs. In paglasa bihaini makaangkat kanila pa hambuuk hantian wayhugna’ sin karayawan iban wayhugna paghadil ha pangatayan sin kalasahan nila.

• Misan in katan namamaratsaya daing ha ummat hi Muhammad [saw] masalamat misan in karayawan nahinang tuput da nakaminsan namung sin Laila ha Illah Allah ha kabuhi’ niya, mataud kajinis sin sulga’ para ha katan. In namamaratsaya amun way nagmumpaat nagig sin sipat niya biya’ binatang, patattapun siya ha pagiipatan binatang – amun pagbahasahun sin Maulana ha mababa’ sulga ha babaan sin Aras. In manusiya’ bihadtu nabuhi’ biya’ sipat binatang. Bilang binatang nabuhi’ sila way pagtangggungjawab daing ha sabab yadtu di’ tuud sila dihilan pangandul, sabab wayruun magdihil sin unu unu mahalga’ pa tau bukun sangput iban way tanggungjawab. Wayruun ama’ magtukbal sin pagusaha pa anak ha laum lampin pa atawa pa tau maas amun way pagtanggungjawab.

• Hangkan da in Maulana nagsabbut makamataud sin Suhba, ha supaya makapatindug iban daran in pagparayaw sin kaul-piil, mag-ig sin tabiat ta biya’ binatang, sarta’ dumaut sin tabiat biya’ malaikat. In manga bihadtu makabawgbug sin tanggungjawab, daing ha sabab yadtu sila na in manga makatabuk pangandul, sambil tumaykud sila daing ha dunya ini bilang Khalifas, ha supaya madawhat in hantian sin Rabbani, daing ha barakat sin nakasampay pa hinapusan sin salingkat-lingkat pagtulak ini, sambil angkatun siya pakatubus, sin Shaykh natu’.

• In Rasul (saw) piyara magtubus sin kaul-piil marayaw. Ampa na kita magduruhun maglanu sin ginhawa ta daing ha laku tabiat iban sipat mangi’, ampa na magduruhun in kasuuk ta pa Tuhan. In katan natabuk gulal iban kahalan wayra maana, bang in kaawnan mangi’ da in kaul-piil. Misan in kaawnan sin Rasul (saw) mataud ngan iban gulal, wayruun in manga sila simud pa Islam sabab sin salaggu’-laggu’ gulal sin Rasul (saw); simud sila pa Islam sabab sin kiyananaman nila in lasa iban kasabunnalan pa tiyap-tiyap kabuhi’ nila gawha’, pinda sila daing ha kabuhi’ kulang dayaw, madtu pa kabuhi’ awn huwatun, nahilu sila sin lasa pa Tuhan, makuyag hapagtulak pa alam limaya, didtu iban Siya, Salama-lama!

• In Rasul [saw] nagdara patumtum taga rahmat iban kakuyagan, in kaul-piil niya nakadagpak pa katiblukan pangatayan sin manusiya’, misan in tau matugas matunaw ra sin kapatibaba’ niya, kalunuk iban Sabunnal pangsut sin rahmat. Wayruun siya imiyan hat malasa ha ummat, sagawa biyuhi’ niya sambil in tau hakatilibut niya, nakakinam. Misan in kita, amun nabuhi masuuk hangpu taglima jaman masi pa nakakinam!

• In Rasul (saw) di’ magpamali’ atawa mamungmung ha tau hakatilibut niya sin himumungan panghina’ amun mahinang sabab hikadihil kabinsanaan iban kahinaan. Wayruun misan nakaminsan nahinang niya, daing ha sabab yadtu subay kitaniyu maayad sin hipaglapal natu’ kansiyu kansiyu na. Hi Shaykh Bahauddeen, anak usug sin Maulana, namayta’ kaku’ hapagbak namu’ ha Kuala Lumpur, “In hi Ama’ ku wayruun nakapasakit atay sin tau hakabuhi’ niya. Daran niya aku pagbaytaan, in pagayad ha pangatayan sin tau katan, biya’ pagayad ha kappal kassa’, amun bang mu bagbagun, di’ muna hikabalik pa awal kajari niya. Taymaa in katan ha kaawn nila, sabab hinang sila sin Allah bihadtu.” In hambuuk awliya bihadtu in atay niya, makapatibuuk sin katan pangatayan. Himumungan hipu sin hikma iban kasabunnalan!

• Maraw pa ikaw in kasakitan, dain sin ikaw in makapasakit, sabab misan maunu pa taud in hibassara mu ha pagpangayu’ mu maap paghuwas yadtu, atawa mabaya’ mu sulayan bayaran in bissara panghina’ kiyabungat mu, di’ muna mapatli’ magbalik in atay nababagbag na! Awn Hadis “In magbali’ atay sin Bariman, biya’ ra naglubu sin Ka’aba,” sabab in atay sin namamaratsaya Aras sin Allah.

• Pagsumadja kaw ha manusiya iban pagaddat. Misan in Allah SWT nagpakita’ da pagaddat ha piyapanjari niya.

وَلَقَدۡ كَرَّمۡنَا بَنِىٓ ءَادَم

Iban sabunnal tuud liyaggu’ Namu’ in Anak Apu’ Adam. (Quran 17:70)

• Mataud tuud manusiya magbassa hadja sin ayat ini; kawaun nila bang sila mabaya’ pagaddatan, sagawa’ lupahun nila bang sila di’ magaddat ha kaibanan. In nasihat subay hidihil iban atay malunuk, way paglugus iban pagpabuga’. Mataud hadis manunjuki hapagpasampay sin Rasul (saw) sin kalunukan, iban pagnasihat ha manga sahabat ha way makita’, di’ niya hipagpamahalayak in kasaan sin sahabat niya ha waktu naghuhutba’ atawa ha manga Suhba. In Allah As-Sattar, Magtataming, In kabayaan Niya katu’ patabunan in kasaan sin taymanghud natu’. Nagsabda in Rasul (saw), “Hisiyu-siyu in nagpaguwa atawa nagpamahalayak sin manga kasaan sin hambuuk bariman, hipamahalayak sin Allah in tiyatapuk niya, misan pa in kaawnan jimatu ha laum bay niya kandi.”

ٱذۡهَبَآ إِلَىٰ فِرۡعَوۡنَ إِنَّهُ ۥ طَغَىٰ. فَقُولَا لَهُ ۥ قَوۡلاً۬ لَّيِّنً۬ا لَّعَلَّهُ ۥ يَتَذَكَّرُ أَوۡ يَخۡشَىٰ

“Kadtu na kamu karuwa kan Fir’aun, sabunnal tuud in siya nakaliyu na daing ha katan jangkaan; [43] “sagawa’ pamissara kaw kaniya lamma lambut; adakala matayma’ niya in patumtum atawa kabuga’ [Allah].”[44] (Quran 20:43-44)

Daing ha sabab yadtu wayruun hikadaawa sin hisiyu siyu daing katu’ mamissara pa hisiyu-siyuna, misan way namamaratsaya, labay ha panghina’ iban makasla.

• Gamman, taabbita sila pa kasabunnalan, biya’ sin daakan sin Allah, ha sumunud:

ٱدۡعُ إِلَىٰ سَبِيلِ رَبِّكَ بِٱلۡحِكۡمَةِ وَٱلۡمَوۡعِظَةِ ٱلۡحَسَنَةِ‌ۖ وَجَـٰدِلۡهُم بِٱلَّتِى هِىَ أَحۡسَنُ‌ۚ إِنَّ رَبَّكَ هُوَ أَعۡلَمُ بِمَن ضَلَّ عَن سَبِيلِهِۦ‌ۖ وَهُوَ أَعۡلَمُ بِٱلۡمُهۡتَدِينَ

Taabbita [katan] pa dan sin Tuhan mu labay ha kapandayan iban salingkat-lingkat pagpasampay; iban pagarujawab kaw iban sila ha manga dan amun sarayaw-rayaw iban labi karidaan: sabab in Tuhan mu nakahati sarayaw-rayaw hisiyu in simiha’ daing ha Dan Niya iban hisiyu in nakatayma’ sin pamandu’. (Quran 16:125)

Misan kaw di’ makatayma’ sin aturan/panindugan/pamikil, sagawa subay kita humalli’ ha di’ makapagkalu, subay natu’ tuud “Taabbita [katan] pa dan sin Tuhan mu labay ha kapandayan iban salingkat-lingkat pagpasampay; iban pagarujawab kaw iban sila ha manga dan amun sarayaw-rayaw iban labi karidaan’. Amunadtu in bayta’ ha Qur’an.

• Subay kitaniyu di’ magputing atawa magpitna daing ha sabab sadja di’ kita makatayma sin pikilan sin kaibanan.

إِنَّ ٱلَّذِينَ جَآءُو بِٱلۡإِفۡكِ عُصۡبَةٌ۬ مِّنكُمۡ‌ۚ لَا تَحۡسَبُوهُ شَرًّ۬ا لَّكُم‌ۖ بَلۡ هُوَ خَيۡرٌ۬ لَّكُمۡ‌ۚ لِكُلِّ ٱمۡرِىٍٕ۬ مِّنۡہُم مَّا ٱكۡتَسَبَ مِنَ ٱلۡإِثۡمِ‌ۚ وَٱلَّذِى تَوَلَّىٰ كِبۡرَهُ ۥ مِنۡہُمۡ لَهُ ۥ عَذَابٌ عَظِيمٌ۬ . لَّوۡلَآ إِذۡ سَمِعۡتُمُوهُ ظَنَّ ٱلۡمُؤۡمِنُونَ وَٱلۡمُؤۡمِنَـٰتُ بِأَنفُسِہِمۡ خَيۡرً۬ا وَقَالُواْ هَـٰذَآ إِفۡكٌ۬ مُّبِينٌ۬

Sabunnal tuud hisiyu-siyu in nagda bayta’ puting yadtu, lamud da siya ha tumpukan niyu. Ayaw muna bistaha in bayta’ yadtu mangi’ kaymu adapun in yadtu marayaw kaymu: in satiyap usug daing kanila (makatayma da sin ajab) daing ha dusa nahinang nila iban hisiyu-siyu daing kanila in kiyabahagian labi malaggu’ daing ha dusa nahinang nila in siya makatayma ajab salaggu’-laggu’. (11) Mayta in manga bariman usug iban babai di’ magparayaw sin huna’-huna’ pa baran nila kandi, ha waktu kamu makadungug sin bayta’ puting sambil pamungan “(In ini) hambuuk bayta’ puting matampal”? (Quran 24:11-12)

• Bang in panuhuma sumampay pa pangdungug, in panagnaan piyanghindu’ katu’ sin Qur’an, papaawnun marayaw pamikil ha taymanghud ta Muslim [amun tudju kaniya nahinang in tuhuma]. Pagubus ampa kita diyaak hipapauki’ in kahalan daing ha manga tau kapangandulan. Subay kita di’ lumaksu magtuy pa kasimpulan mangi’ iban kangiun ta siya sin panuhuma bukun bunnal.

• Subay kita magmabuga’ ha Allah, sabab, nasabbut ha surah ha taas in satiyap tau daing ha manga manusiya’ yadtu makatayma’ ajab salaggu’-laggu’.

وَلَوۡلَا فَضۡلُ ٱللَّهِ عَلَيۡكُمۡ وَرَحۡمَتُهُ ۥ فِى ٱلدُّنۡيَا وَٱلۡأَخِرَةِ لَمَسَّكُمۡ فِى مَآ أَفَضۡتُمۡ فِيهِ عَذَابٌ عَظِيمٌ (١٤) إِذۡ تَلَقَّوۡنَهُ ۥ بِأَلۡسِنَتِكُمۡ وَتَقُولُونَ بِأَفۡوَاهِكُم مَّا لَيۡسَ لَكُم بِهِۦ عِلۡمٌ۬ وَتَحۡسَبُونَهُ ۥ هَيِّنً۬ا وَهُوَ عِندَ ٱللَّهِ عَظِيمٌ۬ (١٥) وَلَوۡلَآ إِذۡ سَمِعۡتُمُوهُ قُلۡتُم مَّا يَكُونُ لَنَآ أَن نَّتَڪَلَّمَ بِہَـٰذَا سُبۡحَـٰنَكَ هَـٰذَا بُہۡتَـٰنٌ عَظِيمٌ۬ (١٦) يَعِظُكُمُ ٱللَّهُ أَن تَعُودُواْ لِمِثۡلِهِۦۤ أَبَدًا إِن كُنتُم مُّؤۡمِنِينَ (١٧)

Bang hadja bukun ulung iban rahmat sin Allah kaymu di ha dunya iban ha ahirat, sabunnal tuud paratungan kamu ajab salaggu’-laggu’ nagsabab hadja ha pagbissara mu sin hal bayta’ puting yadtu. (14) Ingata ha waktu kamu timayma’ sin puting yadtu daing ha simud pa simud iban piyamung mu ha simud mu unu in di’ mu kahatihan misan tiyu’-tiyu, iban tiyayma’ mu siya way halga’, parahal ha pangatud sin Allah in yadtu hal dakula’. (15) Iban mayta’ kamu way namung ha waktu diyungug mu?” Bukun marayaw katu’ magbissara sin ini. Mahasutci kaw, in ini amuna in puting salaggu’-laggu’. (16) Piyatumtum kamu sin Allah ha supaya di’ mu balikan in bihadtu [tabiat] salama-lama, bang in kaawnan mu namamaratsaya. (Quran 24:14-17)

• In pangatud sin manga Muslim adlaw ini ha pitna iban puting bilang hambuuk magaan parakala’ ha dila’ nila. Limingkud sila ha hambuuk madjilis maglimut pasal sin hisiyu-siyu na. Way nila kiyaingatan in yadtu parakala’ malaggu’ ha pangatud sin Allah! Namung in Rasulullah (saw) “Bang mu masiguru kaku’ kajagahan in duwa parakala’ yan kaymu, masiguru ku kaymu in Sulga’ – Jagahan in ha antara’ sin simud (dila’ mu) iban amun ha antara sin kaayban mu [alupan mu].” In hambuuk hadis namayta’, ‘In bariman, amun hisiyu-siyu salamat kaw kaniya, daing ha himumungan iban kakahinang.”

• O kamu manga namamaratsaya pagpahinang kamu bilang magpalindug sin kaadilan karna’ Allah, ha waktu nahinang saksi ha hinang adil, iban ayaw mahinang in bunsi mu pa hambuuk kaum sabab sin hikapalling mu daing ha kaadilan.

يَـٰٓأَيُّہَا ٱلَّذِينَ ءَامَنُواْ كُونُواْ قَوَّٲمِينَ لِلَّهِ شُہَدَآءَ بِٱلۡقِسۡطِ‌ۖ وَلَا يَجۡرِمَنَّڪُمۡ شَنَـَٔانُ قَوۡمٍ عَلَىٰٓ أَلَّا تَعۡدِلُواْ‌ۚ ٱعۡدِلُواْ هُوَ أَقۡرَبُ لِلتَّقۡوَىٰ‌ۖ وَٱتَّقُواْ ٱللَّهَ‌ۚ إِنَّ ٱللَّهَ خَبِيرُۢ بِمَا تَعۡمَلُونَ

Pagpahinang kaw Adil: karna’ in adil masuuk pa pagmabuga’: iban pagmabuga’ kaw pa Allah sabab in Allah labi mataliti sin katan hihinang mu. (Quran 5:8)

• In Adab, magpaway, magpatikupu’ ha unahan sin Tuhan mu. Hi Maulana Shaykh Adnan nagnasihat katu’, hipabin in katan pupudjihan natayma’ ta ha pagbubugitan kaput masuuk pa lawang ha guwa’. Misan unu in pupudjihan katu’ ayaw mu binan in madjilis nagdara sin pupudjihan yadtu. Binan ha taykud mu, iban taykud kaw daing ha madjilis sin way unu-unu, wayruun tau, kapanyapan amun way paidda iban halga’. Ha bihaun in yadtu labi mahalga’, sabab in maksud sin tariqah magpahinang way. In kasabunnalan amun yadtu, in kita ini manga lambung sin Tuhan, in kita way upaya bang in Tuhan di’ magpahibal katu’.

فَلَمۡ تَقۡتُلُوهُمۡ وَلَـٰكِنَّ ٱللَّهَ قَتَلَهُمۡ‌ۚ وَمَا رَمَيۡتَ إِذۡ رَمَيۡتَ وَلَـٰكِنَّ ٱللَّهَ رَمَىٰ‌ۚ وَلِيُبۡلِىَ ٱلۡمُؤۡمِنِينَ مِنۡهُ بَلَآءً حَسَنًا‌ۚ إِنَّ ٱللَّهَ سَمِيعٌ عَلِيمٌ۬

Wala’ mu sila napatay, sagawa’ Allah in nagpatay kanila. Iban in ikaw (o Muhammad) bukun amun nakatilu’ ha waktu pagtilu’ mu, sagawa’ Allah in nagtilu’, ha supaya niya kasulayan in manga bariman sin kaadilan daing Kaniya. Sabunnal tuud in Allah labi makarungug, iban labi makaingat. (Quran 8:17)

• Piyahawpu’ hi Maulana Shaykh Adnan pa hangka ayat. In kita ini buat malaingkan Lambung sin Sipat sin Tuhan, in kita ini wayra. Daing ha sabab yadtu subay kita magpatibaba’, ayaw kaw magpasakit kansiyu-kansiyu na (sin himumungan atawa kakahinang) iban paglugtu’ hi ig in sipat mu biya’ binatang, ha supaya in kitaniyu, makananam da isab sin lanab amun miyumuhut sin guru natu’ Abu Yazid (qs) kananaman ha adlaw paghukum.

 

Ameen ya Rabbal Alameen

The Translator can be reached through: aabdurajim@gmail.com

translator’s blogs:

http://alltausug.co.cc ,

http://tausugglobalmedia.co.cc